கிணறும் கேணியும்
சொல் பொருள்
கிணறு – இறைத்துக் கொள்ளத்தக்க ஆழ்ந்த நீர் நிலை. கேணி – அள்ளிக் கொள்ளத்தக்க ஊற்று நீர்நிலை.
விளக்கம்
தோட்டத்தும் பிற நிலத்தும் கிணறு உண்டு. தோட்டம் துரவு என்பது இணைமொழி. துரவு ஆவது கிணறு. மிகப் பழங்காலத்தே உறைக் கிணறு இருந்தமை ‘உறைக் கிணற்றுப் புறச்சேரி’ எனவரும் பட்டினப் பாலையால் அறியலாம்.
கேணி ஊற்று நீரால் “தொட்டனைத் தூறும் மணற் கேணி” என்பதால் தெளிவாம். ஆற்றங்கரை ஊரார் ஊற்று நீர் எடுத்துப் பருகுதல் கருதி அதனை ‘ஊருண்கேணி’ என்பர். ஊருணி, ஊரணி, ஊருண்கேணி ஆய மூன்றும் வெவ்வேறானவை என்பதை அறிக.